Մայամիի ոստիկանությունը ձերբակալել է մի օդային խուլիգանի, ով թռիչքի ժամանակ փորձել է բացել Frontier Airlines ավիաընկերության ուղևորատար լայների դուռն ու խեղդել բորտուղեկցորդին։ Այս մասին հայտնում է CNN հեռուստաալիքը։

Միջադեպը տեղի է ունեցել Սան Խուանից (Պուերտո Ռիկո) Չիկագո (Իլինոյս նահանգ) չվերթի ընթացքում։ 51-ամյա Խուան Գաբրիել Ռեյեսը մի քանի անգամ փորձել է բացել վթարային ելքի դուռը և ներխուժել օդաչուների խցիկ: Սակայն նրան խոչընդոտել և փոքր-ինչ հանդարտեցրել են, ինչից հետո Ռեյեսը հարձակվել է բորտուղեկցորդի վրա և փորձել խեղդել նրան։ Կարգազանցին հաջողվել է սանձել միայն մյուս ուղևորների օգնությամբ։

Արդյունքում՝ ինքնաթիռն ընդհատել է թռիչքն ու հարկադիր վայրէջք կատարել Մայամիի օդանավակայանում, որտեղ էլ օրինախախտին բերման է ենթարկել ոստիկանությունը։

Source: https://news.am/hy/news/1040484