Ադրբեջանը մշտապես առաջնորդվել է հումանիզմի սկզբունքներով և հայտարարել, որ անհայտ կորածների խնդրի կարգավորումը Հարավային Կովկասում խաղաղության ու վստահության ամրապնդման գործընթացի կարևոր մասն է։ «Report»-ի փոխանցմամբ՝ այս մասին Բաքվում ընթացող անհայտ կորածների հարցերին նվիրված միջազգային համաժողովի ժամանակ հայտարարել է Ադրբեջանի արտաքին գործերի փոխնախարար, Գերիների, պատանդների և անհայտ կորած քաղաքացիների հարցերով պետական հանձնաժողովի անդամ Էլնուր Մամեդովը։
«Անհայտ կորածների խնդրի լուծումը պահանջում է բոլոր կողմերի համատեղ ջանքերն ու թափանցիկ համագործակցությունը։ Անհայտ կորած յուրաքանչյուր անձի ընտանիք իր սեփական ողբերգությունն է ապրում։ Անհայտ կորածների հարցը գլոբալ հումանիտար օրակարգի առաջնահերթ թեմաներից է», - նշել է Մամեդովը։
Նա նաև հավելել է, որ 2020 թվականի նոյեմբերից ի վեր Ադրբեջանը փոխանցել է մարտի դաշտում հայտնաբերված ավելի քան 2000 հայ զինծառայողների մարմինները։
Source: https://news.am/hy/news/1046848