Հայաստանի թանգարանների աշխատակիցները կամավոր ատեստավորման արդյունքներով կկարողանան հավելավճար ստանալ։ Համապատասխան որոշումն ընդունվել է մայիսի 27-ին կայացած Կառավարության նիստում։

Ինչպես նշել է Կրթության, գիտության, մշակույթի և սպորտի նախարար Ժաննա Անդրեասյանը, հուլիսից նախատեսվում է թանգարանային աշխատողների միջին աշխատավարձի 57% աճ։ Այսինքն՝ խոսքը ամսական մոտ 200 հազար դրամի մասին է։

Այսպիսով, նրանցից շատերը կկարողանան օգտվել նաև առողջության համապարփակ ապահովագրությունից, որն այս տարի հասանելի է ամսական առնվազն 200 հազար դրամ եկամուտ ունեցող անձանց համար։

Նախարարն ընդգծել է, որ վերջին 5 տարում թանգարանների հաճախելիությունն աճել է 40%-ով, իսկ 2025 թվականին այցելուների ընդհանուր թիվը կազմել է 1 միլիոն 353 հազար՝ չհաշված «Թանգարանների գիշեր» անվճար ակցիայի շուրջ 200 հազար մասնակիցներին։

Այս ամենն էականորեն մեծացրել է թանգարանների սեփական եկամուտները։ Եթե 2022 թվականին դրանք կազմում էին 770 միլիոն դրամ, ապա 2025-ին հասել են 1 միլիարդ 63 միլիոն դրամի (մոտ 2,9 միլիոն դոլար)։ Միևնույն ժամանակ, թանգարանների ընդհանուր ֆինանսավորման մեջ սեփական եկամուտների մասնաբաժինը 26%-ից բարձրացել է 38%-ի։

Գերատեսչությունում վստահ են, որ աշխատակիցների լրացուցիչ խրախուսումը կօգնի է՛լ ավելի բարելավել այս ցուցանիշները։

Source: https://news.am/hy/news/1038732